Qershor 2021
Për Kosovën si një shtet i ri, një administratë publike efikase dhe e përgjegjshme përbën një pjesë thelbësore të qeverisjes demokratike dhe funksionimit të shtetit. Reformimi dhe përmirësimi i funksionimit të administratës publike ka qenë një çështje kryesore në marrëdhëniet BE-Kosovë në vitet e fundit.
Ky raport përmbledhës synon të pasqyrojë dhe diskutojë situatën e reformave të administratës publike në Kosovë gjatë viteve të fundit, përmes përqendrimit në dokumentet dhe strategjitë që janë aprovuar gjatë kësaj periudhe. Për më tepër, raporti do të analizojë arritjet kryesore dhe nivelin e zbatimit të RAP-it deri më tani dhe do të sugjerojë rekomandime për qeverinë e re të Kosovës për t’u zbatuar, bazuar në sfidat kryesore që duhet të adresohen.
Ky raport është punuar në kuadër të projektit "Përmirësimi i llogaridhënies dhe transparencës për reforma", i zbatuar nga PIPS dhe Lëvizja FOL, dhe i mbështetur nga Ambasada e Mbretërisë së Holandës në Kosovë.
Maj 2021
Në Kosovë aktualisht, të huajt mund të jenë pronar të paluajtshmërive vetëm nëse pronësinë e fitojnë përmes trashëgimisë. Marrë parasysh synimin e Kosovës për anëtarësim në Bashkim Evropian (BE), kjo gjendje është duke ndryshuar. Marrëveshja e Stabilizim-Asociimit (MSA) ndërmjet Kosovës dhe BE-së parasheh hapjen e tregut të pronave të paluajtshme të Kosovës për shtetasit dhe kompanitë e shteteve anëtare të BE-së.
Pavarësisht dispozitave të qarta të MSA-së në këtë drejtim, në praktikë hapja e tillë të tregut sfidohet në parim nga korniza ligjore aktuale në Kosovë për të drejtat pronësore dhe mënyra e zbatimit të saj. Hapja e tregut të paluajtshmërive, pa dyshim që ka potencial të ketë ndikim të caktuar në Kosovë. Në këtë studim pra analizohet korniza ligjore, sfidat dhe ndikimi i pritur, dhe jepen rekomandime.
Maj 2021
Publikimi "Një diskutim i shkurtër mbi rëndësinë e MSA-së dhe Dialogut Politik ndërmjet Kosovës dhe Bashkimit Evropian (BE)" argumenton rëndësinë e shfrytëzimit të Titullit II për Dialogun Politik nga Kosova për të arritur mbështetjen e BE-së në konsolidimin e dimensioneve të jashtme shtetërore përmes bashkëpunimit me BE-në, në përvjetorin e pestë të hyrjes në fuqi të Marrëveshjes së Stabilizim-Asociimit.
Përtej asaj se dialogu për normalizimin e marrëdhënieve Kosovë-Serbi përbën një pjesë të rëndësishme të Titullit II, ky kapitull ofron potencial të pashfrytëzuar për mënyrat tjera të bashkëpunimit ndërmjet Kosovës dhe BE-së.
Ky publikim analizon ngecjet nga ana e Kosovës në shfrytëzimin e këtij potenciali dhe ofron rekomandime për mënyrën e aplikimit tash e tutje.
Ky publikim është publikuar në kuadër të Programit për Analizë të Politikës së Jashtme të PIPS. Publikimi u mundësua me mbështetjen e Fondacionit Kosovar për Shoqëri Civile.
Prill 2021
Mjedisi afarist në Kosovë mbikëqyret nga mbi 30 inspektorate, të cilët janë krijuar nga viti në vit në mënyrë të çorganizuar dhe pa politika unike, koherente e të koordinuara mirë.
Reformimi i inspektimeve ka qenë pjesë e prioriteteve të përbashkëta politike për zbatimin e MSA-së, përmes Agjendës për Reforma Evropiane (ERA), që nga nëntori 2016, kur ERA ishte miratuar nga Qeveria.
Kjo analizë politikash e trajton këtë reformë në tri aspekte. Së pari, përshkruhet gjendja aktuale lidhur me këtë reformë. Së dyti, identifikohen mangësitë dhe sfidat me të cilat mund të përballet zbatimi i saj. Së treti, jepen propozime konkrete..
Mars 2021
Në kuadër të projektit "Rritja e transparencës dhe llogaridhënies për reforma" të zbatuar nga PIPS dhe Lëvizja FOL është publikuar monitorimi i Planit Vjetor të Punës së qeverisë Hoti.
Janar 2021
Publikimi i fundit i PIPS adreson temën e normalizimit të marrëdhënieve ndërmjet Kosovës dhe Serbisë. Publikimi është mbledhur përmes një formati të veçantë, i cili përmbledh pikat kryesore të tre diskutimeve të ndara me ekspertë mbi temat e Asociacionit të Komunave me Shumicë Serbe, Drejtësia Tranzicionale dhe Ballafaqimi me të kaluarën, si dhe Politika e Jashtme dhe Bashkëpunimi Rajonal.
Dhjetor 2020
Anketa 'Politika Ndërkombëtare dhe Dialogu Kosovë-Serbi: Perceptimet e Qytetarëve të Kosovës' botohet në baza të përvitshme në kuadër të Programit për Analiza të Politikës së Jashtme (PAPJ), që është një nga programet kryesore të PIPS. Ky është edicioni i tretë i anketës, i publikuar në bashkëpunim me Konrad Adenauer Stiftung (KAS), zyrja në Prishtinë.
Qëllimi i këtij edicioni të anketës është ofrimi i të dhënave dhe rezultateve për perceptimet publike të qytetarëve kosovarë për: Politikën ndërkombëtare dhe akterët ndërkombëtarë, që ofron të dhëna për perceptimet në raport me politikën ndërkombëtare dhe aktorët rajonalë dhe globalë, duke përfshirë shtetet dhe organizatat ndërkombëtare & Procesin e dialogut Kosovë-Serbi, më saktësisht perceptimet e qytetarëve kosovarë për Marrëveshjen e Washington-it, asocacionin e komunave serbe si dhe arritjen e një marrëveshje finale për normalizimin e marrëdhënieve mes dy shteteve.
Shtator 2020
Megjithëse përparimet teknologjike dhe shkencore të dekadave të fundit kanë përmirësuar aftësinë e njeriut për t'iu përgjigjur sëmundjeve të tilla si Covid-19, pasojat e tyre nuk janë të vogla, kështu që koronavirusi ka qenë një faktor i rëndësishëm prapa ndryshimeve të fundit në fushën e diplomacisë dhe marrëdhëniet midis qeverive dhe organizatave ndërkombëtare. Pyetjet kryesore që vërtiten rreth një enigme të tillë kanë të bëjnë me implikimet gjeopolitike që janë prodhuar në rendin aktual botërorë dhe aktorët ndërkombëtarë. Ky punim i shkurtër përshkruan disa efekte që Covid-19 ka pasur në politikën ndërkombëtare deri më tani. Ky dokument rendit tre fusha në të cilat Covid-19 mund të prodhojë ndikim thelbësor: marrëdhëniet midis SHBA dhe Kinës, idetë e globalizimit dhe konfliktit të armatosur dhe dhunës politike.